ونتقابل على المرسا
وجوه عنينا فرحه وشوق
نشوف الدنيا نور وشروق
ونتوضى يا أغلى الناس ..
فى بحر الضوء
ونطلع فوق .. نقابل نجمه مشتاقه
نكون الخطوه سباقه
زمان قالوا : (مسير الحى يتلاقى)
صبحنا يا غالى ع السكه
قصايد حب .. بحر حنان .. أمان .. ضحكه
هدمنا حائط المبكى
وخدنا الحب .. شفنا مدينة الأحلام
وغنينا مع الأيام .. أغانى الفرحه والإخلاص
يا أغلى الناس .. جناح الحب خدنى خلاص
صبح كل الوجود صافى
وليل دافى .. ونور يتباس
ولا بانساك .. ولا هانساك
لأنك كنت لىّ ملاك
وكنت شطوط من الإحساس
رسمتك فوق شطوط الليل وتر حساس ..
وغنيتك
وخليتك قمر ع الكون
أخدنى بيتك الطاهر لأحلى عيون
يا قلب حنون مدفينى
مهنينى .. مغطينى
هواك .. جوه فى وجدانى
ولو هانضيع على السكه
مسيرنا لبعضنا تانى
مسيرنا لأرضنا تانى
نعود نسمع .. أغانى الشوق بألحانى
حبيبى يا لحن إنسانى
ولا بانساك .. لأنك فى الفؤاد ساكن
ولكن ..
فيه ساعات باتعب من الفرقه
وتجرى الدمعه ع الورقه ..
وأكتبلك مواويلى
يا نور عينى .. يا غالى يا أغلى م الغالى
باحبك ع الطريق إنسان ..
بيحمل هم أحبابه
ويوهب عمره لاجل الجار ..
ويسقى ورد أصحابه
وفاتح للجميع بابه
ولو حتى الطريق داكن
ولا بانساك
لأنك جزء من تكوينى وشعورى
وشوكى القاسى .. وزهورى
وتكعيبتى وأشجارى
لأنك صُحبتى وجارى
لأنك " دارى " جوه الريح
صريح دايما .. ومش خاين
وصاين قلبى .. إنت ندايا فى الزحمه
ونهر العطف والرحمه
رسمت النجمه فوق توبى
وجيبت الشمس لدروبى
يا محبوبى .. يا نور النور
وقف عصفور رقيق ع السور
وغنينا بحب معاه
نسينا الآه .. ولا الحب اللى بيننا تاه
لأنك لىّ .. أحلى حياه
لأن الحب لو يلبس فى توب إخلاص
بيبقى صلاه
****************************
عبـــــير الجنـــــــــدي
ليست هناك تعليقات:
إرسال تعليق