نلومك ياقصيدتي ملي قصدتيني
ودرتيني سبة وطلعتي للقبة
وجيتيني تحبي على الركبة
محرفة گربة وملحفة الشطب
ملي انت ما هجالة ما عزية
اش داك لرحبة العشق والمحبة
اش داك تدخلي للحرب
وتهزي المكحلة والحربة
وترشگيها في الكلب
هادي رحبة لماليها ماشي لعب
نلومك ملي قريتي لبرا من لگفا
وصممت دخول الرحبة
وگلت عليها نعرف ونگد
نروم البگرة تضرب ولضرعها نحلب
ملي انت غير طبيبط اش داك
تحومي على الطير الحر
اش داك تلبسي شربيل الصم
وتسحل ي الجلد الرطب
بقات في الركبة فوگ لدهم
علاه غير نوض سوگ السربة
خاصها علام يصيح بالندهة
خاصها كلام يعشق البارود والحب
ماشي من والا ماشي من هب وذب
شكون عطاك الحق ديري لي نشبة
ملي كنت على طريق الله نرگب
وملي على قنديلك شفت الدنيا تضوي
وكتبتك قصايد بدمي ونشفت الگلب
ومن حروفي شبعتي ملي
كان كاسي في فمك اكب
وصرت سلطان لقصيدة ومن وادك نشرب
وفي رمشة عين زعما فقتي من الگلبة
ودهنتي فمك بالشبة ووشمت حنكك بالندب
وصارت شمسك من نهاري تغرب و تغيب
وخلتيني على حسكة نقلب
بها نضوي وعلى شعاها نعيدد ونكتب
خليتي قصري خربة من لخرب
ملي تعرفي غير زريعة الحلبة
اش داك تشمي ريحة لحبق
اش من كذبة خلاتني على راسي نكذب
اش داك ضربي لقتيب عليا
خليتيني نطرز في الكتبة ونسرب
اش داك تلبسي القفطان والتحتية
طلقتي السوالف وشعرك يجدب
وتاتك الجلابة الحد في القد
وتاك القب ودليتي لهدب
قفلتي لبابان عليابالزربة
خليتي نفدة منين تطلي وانا نرگب
راني نسال فيك اكثر من النص
بالرسومة وبالكتبة وبخط اليد مسبب
ككتبتيني قصيدة نهار كنت تحلمي بالجد
وكنت دهلاسة ولسانك ملاسة ضارب الطب
حلي البيبان حلي الدفوف
خليني لحروفك نشوف كيف ما نرغب
لا تحنتي غروري راني
نكتبك قصيدة مكشوفة
ونحركك عصيدة كيف ما نحب
نخليك على طرف لسان العادي
والبادي وفيك ينقب
ياقصيدتي لا تهنديني بجوج حروفة
راها شاهدة وخا عينها معمشة ومكروفة
ملي خليتي لساني شلال إصب
والى بان المقصود ردي المردود
وطيبيها فطيرة قبل ما لعجينة
تخمر وتفيض والبرمة تنصب
ويصير لحمك گديد في الحر يتگلب
طلبي سماحة وشطبي بابي بجريد
بالراحة عليك بالراحة وكوني لحلاحة
لا تشمري بليام الخداعة
خليني من تحواش الشطب
راه قصيدتي فضاحة ولسانها طويل
وفمي لحلاح يعطب
اش تگولي يامداحة واش تطلبي السماحة
وتحوشي لحطب
وتكملي لقصيدة وعلى غناها شطاحة
وتسقي الواحةولا تطلبي السلة بلا عنب ... ؟
*لحسن الرجبي
ليست هناك تعليقات:
إرسال تعليق