خففت شوقى وآلامى
بعترت ضيك فى قلبى
نورت عمرى وضلامى
وقتها تهته لسانى
وارتجف م الشوق كيانى
لا قدرت امسك نهر دمعى
ولا حتى افسر لك كلامى
لسه فاكره ياحته منى
كنتى طول عمرك تغنى
أتعب انتى تشيلى عنى
أزعلك وكمان تحنى
والإيدين كانت تطبطب
ألقى حر القلب رطب
كل دا ياغاليه شطب
يوم غيابك يا امه عنى
كنت أنام تسهر عنيكى
واما أخاف قلبى يناديكى
كل هم الدنيا يرحل
ويا لمسه من إيديكى
سيبتى جمر الدمع سايل
بيه كتبت اغلى الرسايل
الحروف صبحت بدايل
اواسى بيها القلب فيكى
من يوميها تهت منى
بعد منك دمعى خانى
سال على خدى وسألنى
مين على الأيام يعنى
راحت النسمة الجميله
راحت الغاليه الأصيله
كان تعبها كل ليله
عشان تنام تسهر تغنى
والختام بحروف رسالتى
عاجز اوصف ليكى حالتى
بعد ما عنى رحلتى
حزنى غلف لى ابتسامتى
الفراق واجع فى قلبى
ليل نهار مش قادر أخبى
الدموع طلقات فى صدرى
كسرت مجداف سفينتى
ربى يفرش لك فى قبرك
نور وضى بقدر صبرك
تحت قدمك يبقى حنه
توصف الجنه فى ردك
لاجل ما يدق الوريد
يوم وصول الرد عيد
واتهجى اسمك من جديد
والحزن يتبدل فى صدرى
من ديوان ضى نهار
مصطفى فريد
ليست هناك تعليقات:
إرسال تعليق