أنا بعتذر يا أمِّي
مش قادرة أشكي لِك
هَمِّي ..
قولي لَبيّي نهلة كتير
مشتاقة ..
تضمَّك بس الدَّمعة
سَخيِّة وحرَّاقَة ..
جار الزمان واتبَدَّلِتْ
القلوب ..
ما عاد في مَحَبِّة
واتغَيَّرِتْ الدروب ..
والحزن مَالِك القلب
والدَّمع بالرُّوحْ يسري
والفَرَح مَصلوب يا أمِّي
كيــفـِك يا أمِّي أنتِ
وبَيِّي ..
خَيّي ما عاد خَيّي
والأخت هَجرتني
للغربِة.. تَركتني
والأيام يا أمِّي خانتني
بِبير يوسف وَحدي
رَمتني ..
بيوم رَحيلِكْ ..
هَاجَرِتْ القلوب وتَركِتْ
مَوطنَّا ..
وبيوم عيدِكْ ..
طفَّينا القناديل وما عدنا
نتهَنَّى ..
بَعْدِكْ يا أمِّي ..
حَجبِتْ الشَّمسْ ضِياها
والقمر بَعْدِكْ خجِل ياخُدْ
من الشَّمسْ سَنَاها ..
على فراقِكْ ..
ناحِتْ الأيَّام ..
وانتَحَر الحُبّ وَالسَّلَام
وخربِتْ الأرض من الظَّلام
يا شَمْس الـ كلـِّكْ دَفَا
على روحِكْ الطاهرة السلام
ألف تَحيِّة وألف سَلام ..
ليست هناك تعليقات:
إرسال تعليق