فى طريق هوان .. مليان غيلان .. الدود بياكل فى الشجر
والفجر مات .. وف قبره بات .. والورد كله بيحتضر
وانا ع الطريق .. هايم غريق .. وطريقى ضلمه .. ملان حُفر
دايب فى ليل .. والليل طويل .. وغُباره دارى ع القمر
يا قلبى آه .. شوف الحياه .. خلتنى فى اليأس انقبر
آه يا جراح .. آه يا نواح .. آه يا سما .. آه يا قدر
خايف كتير .. قلبى الأسير .. فى سجن يأس يكون كَفَر
عاش فى سنين .. عُمره .. حزين .. فى دنيا بتمطَّر إبر
عايش شريد .. باكى وحيد .. والنور فى أرضه ما ظهر
يا دنيا ليه .. بتقطعيه .. ما كفايه فى اليأس اندثر
روحك عفن .. قلبك كفن .. للى اندفن فيكى وصبر
أنا باندبح .. بإيدين شبح .. وانتى ولا عندك خبر
أنا باتخنق .. أنا باتشنق .. وانتى ولا عندك خبر
أنا بانزوى .. أنا بانطوى .. وانتى ولا عندك خبر
2 ⏪الشـــــــاعــــــــــــــــــــره
يا أشعارى وأسفار الرحيل .. إنتى ..
سطور الحب والأفراح
أنا اخترتك لنفسى سلاح ..
بيحمينى من التيار
رغيف للجار ..
وهدمه لطفله جوه الدنيا محتاجه
شطوط بتغنى للموجه ..
أغانى الحب والإلهام
أنا اخترتك لنفسى (إمام) ..
بيهدينى على الطرقات
ماليش إلا انتى يا أوراقى ..
ليل ونهار أناجيكى
أناديكى ..
إذا طالت ليالى التوهه فى عيونى
تنادينى .. تناجينى .. تدفينى ..
وتحمينى من الأشواك
تكونى عشانى طول العمر ..
قلة حب فى الشباك
وتبقى ملاك ..
بيسقينى من المشاوير
إذا طالت ليالى الخوف ..
علىّ .. أركبك أسطول
أقول وأعيد
أعيدُه أقول .. واغنى كمان
أحاول أعزف الألحان
على بابك .. فى محرابك
وأكتب كل أشعارى ..
لأصحابك .. لأحبابك
أطير .. أسبح ..
يا أحلى كلمه فى كتابك
باشوفك يا قصايدى الطاهره طول عمرى
سطور الحب والأفراح
أنا قلبى البرئ ملاح
فى بحر الكلمه ..
مقدافى كلام دافى
يا (دفة حب) لو يسحبنى ليله طوفان
أغوص فى بحورك الورديّه ..
أخرج جايبه فى المرجان
3 ⏪شمبـليـــــــــــــــــــــــون
فيه (شاعره) جوايا ..
عايزه تقول كلام ..
أكبر كتير من سِنها
لكنها ..
خجلانه من كل الحروف ..
دا لأنها ..
شرقيه من عهد الفراعنه ..
كأنها ..
(لغه) مش أليفه ..
وعايزه (شمبليون) يفسر فيها ..
يحكى عنها
(صوره) بتكتب كل حاجه ..
مفيش كلام ..
ولا حاجه باينه منها
وعشان كده
كل الذى يعنيها ..
يظهر جوه أشعارها ..
الحزينه الطاهره .. رنة حزنها
أو .. حتى .. روحها .. و .. فنها
4 ⏪الـــوجـــــدان
لأنك جوه وجدانى ..
لآخر لحظه من عمرى
وعمرك يوم ما تنسانى ..
ومالك في الحياه أمري
لغيت الفرقه من قلبى ..
وقلت الحب سهرنى
وخدتك في الخيال جنبى ..
وقلت يا حلم فسرنى
وباطلب لسه من ربى ..
ما ييجى يوم يحيرنى
وييجى يوم .. وتهوانى ..
تعوض يا حبيب صبرى
*عبيــــــــر الجنــــدي
ليست هناك تعليقات:
إرسال تعليق