يارِيت يِجاوبني حَدّ..؟
( ١)
ليه..
كُلّ مافِ الله تُحِبّ تِتِوِجع..؟
لا كان حلم..
ولاكان ترنيمة وَدَع
ليه الحُبّ للقلب كَفَن
ليه علشان تِحبّ لازم
لازم تِموت ياجَدَعْ..؟
،،،،،
بِجَدّ..
ياريت يِجاوبني حَدّ..؟
(٢)
ليه الدّمعة حِنَيّنة فِ الضّلمة..!
يجري العَطَش يِشْربها
تِشبّعه؛ لبن وخمرة
وعلى رِضابك يِنزل سِمّها
قطرة بتجرّ قطرة..!
،،،،،
بِجَدّ..
ياريت يِجاوبني حَدّ..؟
( ٣ )
ليه..
لمّا في الله نحبّ
نلاقي قلب خايف
عايز بَسّ يِتحَبّ
ولمّا نقول: ياربّ..؟
يِنْزِل المطر حُزْن
تجري الروحُ تغطيه
تلاقيه
فِ حُضن تاني مَرمي فيه
ويقولّك: حبيبي ده غَصبْ..!
،،،،،
بِجَدّ..
ياريت يِجاوبني حَدّ..؟
( ٤ )
لمّا قلب الباب يواربه..
يبقى مِستنّي
نبض بينادي حُبّه
يعتكف النّيني منتظره
لا قادر يقفله
ولا يتحمّل عذابات تردّد حسّه..؟
ولمّا حُبّ؛ إنت مِشْ عايزه
إقفله في وشّه..
ليه..
عَسل الحُبّ تلذّه..
وللمُحبّ تسيب قرصه..
وتمضغ خلايا حلمه..
وتحت أقدام المّاره وَحْده
بتضحك على عيشته
وهوّه لسّه بيحيا بصقه..!
،،،،،
بِجَدّ..
ياريت يِجَاوبني حَدّ..؟
(٥)
حُزنٌ جوّايا بيمتدّ..
عاوز أوقفه..؟
سؤال وبيحفره..؟
ياريت يجاوبني حَدّ..؟
هوّا ليه
ليه لازم تموت لمّا
حقيقي في الله تحبّ..؟
وعلشان تعيش لازم
لازم ماتحبّش حَدّ..؟
واللا مين..؟
مين اللي لازم يموت بِجدّ..؟
،،،،،،
أيُّها الحُزن..
متى يكون لك حَدّ..!
لاتقل: عندما يموتُ الموت..!
فما الجدوى؛
وفي الحياة قد انتهيت..!
هوّا الحُبّ حقيقي..
واللا
اللي بيحبّ لازم..
لازم يموت بجَدّ..؟
،،،،،
بِجَدّ..
ياريت يِجَاوبني حَدّ..؟
ليست هناك تعليقات:
إرسال تعليق