اعشقني بحريّۃ | شعر محكي ... * زينب حمادة

⏪⏬
1
بشرعك حرام الخمر ..
والاحساس
ووجّك نبيد

وسحرك الآية
بدي بشرعك إعمل نكاية
عنك غصب رح تسكر بلا كاس
أول ما تتطلّع بالمراية

2
ما قدرت شوفو واسكت
ما قدرت كفيه اصلا قلبي بكي عليها ..
بمحكمة ..حكّامها شياطين
ما في حدا فيها بيناصرنا
ولأيمتى بدّو يضل الدين
سوط عم يجلد خواصرنا

3
مش عليي الحق

كلّو خطايا
وما قدرت خبيت
بعرف يا الله ...
حاج تكفرلي !!!
قبالي قعد ...
ما عرفت شو صرلي
صرلي زمان كتير
ما صلّيت
ما خطيت لولا قبلت
تغفرلي

4
ما غفيت...
لا لا
ولا الرمش نعسان
ولا النوم عم
بيدق ع جفوني
خفت ..
عا حلمي تجي بردان
غمّضت
تا دفيلك عيوني

5
من الصبح
بتخانق انا و حالي

بخبرك؟
أو عيب إحكيلك؟

بقلبي؟
بعينيي؟
أو ببالي؟

وين رح خبي تفاصيلك

6
صلاة العيد ..

بسم "العشق"
كلّ الصلا بهديك
عليك السلام
و"قُدِّسَ" سرّك
لا تجرّني تا إتقي
"شرّك"
سبحان كل مطرح
بيخوت فيك
وسبحان شيطانك
اذا تحرّك

7
وكيف رح بهرب من الإحساس
وبعيد الله .. وبيننا مْسافة
تعبان من كتر الصلا وغافي
وعم شوف تمك عا قزاز الكاس
فيّق الف شيطان ع شفافي

8
ببّعّد ما بدّي يشدّني جنوني
تا ضلّ اكتب شعر يتصدّق
وكرمال ابقی فيك مجنونۃ
خليك حلمي..وعيش بعيوني
"الاحلام ما خلقت ت تتحقّق"

9
اعشقني بحريّۃ ولا تشغل بال
ولو خنتني شي يوم صارحني
بضحك ..
بعد ما ودّعك كرمال
بعرف بإنّك بالجَرِح رِجّال
إلّا بقلبي ما بتجرحني

10
مين معو مفك براغي؟
😁😁😁

الحب ..مش يعني عليك ب رِقّ
ولا الشوق كبسة زر ..بتضوّي
بقلبي ما فيك تعيش بالقوة
ن ضليت عالإحساس هيك تنق
ما عاد بدّي قلب فيي يدقّ
رح فكّ قلبي وسلّمك هوّي

11
نسيت النوم

ضيعت نومي
وضلّ كل الليل
فكري على غياب الغفا
سارح
فتّشت ..تا ما ضل
فيي حيل
تذكرت !!!
مش رح فتّش وْلا ميل
نسيتو بحضنك ليلة مبارح

12
قزاز المحبة ال بالقلب عيرة
بيطق لمّا بتولع الغيرة
من هيك ما بشغل بحاسد بال
ولا بسمح ينال الشرف ت يطال
غبرة شعر ع قزاز تفكيري