ياحرفنا المبتور
ياقلب باكى من الالم
لما انكسر سن القلم
وتاه مابين موج السطور
ضاع اتزان الكون خلاص
معكوس فى لفه للعدم
بقيت فى لحظة من زمن
تنبل انا
والتنبله موروث قديم
شارباه جذور العائله
والمشكلة بحلم كتير
إنى اهش غراب كبير
من فوق جدار البيت وانا
قاعد مكانى
ماهى تخمة الجوع
إللى صابت معدتى
قلبت كيانى
خلتنى أحس بطعم جهلى
وبمرار قسوة زمانى
خلتنى أركع للتيوس
واسيب رقبتى فى حبلهم
واهتف وانادى بإسمهم
مات الملك
عاش الملك
وفضلت اطاطى لقسمتى
واحنى بعباطه جبهتى
لما طال منى القفا
ملعون ابوك يا جهل لو كنت الشفا
انا بارفضك
وارفض وصاية كل خاين او جبان
يقتل فى حلقى كلمتى
يكتب حروف الموت
على توب جثتى
يسلبنى حق قضيتى
ليست هناك تعليقات:
إرسال تعليق