البحر هاجوماج
وموج بموجاته العنيفة
كسر بقوة دفقته
كل القلوع الضعيفة
كل القلوب الخفيفة
طلع بهيبة دفعته
حطم مجاديف المركبة
مزع قماش الاشرعة
قطع شرايين الالحفة
غرق شطوط الأرصفة
دفن الغموس والارغفة
جمد عيون الأوردة
خوف جميع الأفئدة
والخوف وجع
والجوع رجع
يملى منشات البطون
وأدى العيون
باصة يوماتي للسما
حالفة ما تنزل إلا ما
تنزل عليهم مائدة
والفائدة
العائدة
مرسومة فوق وش السحاب
إللي داب
من صهد حر الشمس يلسع ف التراب
إللي غاب
وسط الضباب
راح ضباب
جه ضباب
ليه ضباب
هو ضبابكوا ما بيختشيش
وإلا ضبابنا ما بيختفيش
ف تنتيش الولاد
ف لقمة حاف
مسقية فى شربة عذاب
راح عذاب
جه عذاب
ليه عذاب
هو عذابكوا ما بيرتويش
وإلا عذابنا ما بينتهيش
ليه يا دموع الحزن
من عيوني ما بتختفيش
ليه يا ابتسام الفرح
من شفايفي ما تقربيش
افتحي لنا نص باب
يا باب
مقفول لنا
إفتح بقا
قفلين جميع الابوبة
فى وشنا
حتى جميع الأسئلة
مسؤولة بسؤال السؤال المنطقي
والأجوبة
محجوبة بحجاب الحجاب الغبي
والأدعية
يا سيدة
يا منجدة
محتاجة يوم دعوة نبي
يدعي لنا
الفرح يدخل كهفنا
ان شا الله يهدم سطحنا
بشوية مطر
نزرع شوية رز من غير طبيخ
أو لبشتين بطيخ
يرحموني من صريخ
المعدة والأمعاء
أهو نملى الوعاء
والدم يملى الأوردة
والكلمة تصبح مرشدة
والنظرة يملاها الأمل
والواد عمل
والبنت تملا القلة حب
وعودين نعناع
وينسا إنه جاع
وينخلع قلب الرضيع من الأوجاع
يا بحرنا
يا رزقنا
بطل تهيج
وكفاية ملوعة
وكفاية تهريج
واملا شطوطك بالهنا
وتعالا هنا
فى حضننا
دا إحنا حبايب من زمان
اوعاك تقول الود هان
أو إبني خان
بان
كل شيء جوانا بان
وصبح مكتوب ع البيبان
إللي هان
واللي خان
لسة فاضل عندي ليك حتت سؤال
هو صحيح الود هان
وإلا صحيح
ابني خان
*************
الشاعر رمضان فؤاد أبو الوفا
ليست هناك تعليقات:
إرسال تعليق