عشان خاطر عيون حنان .. .......القلب عاشق وولهان جنان
والحب رايه تغطى ع الحرمان ....والزمن نافر كالحصان
الكلام ده الآن
أما كان زمان
مصر يا أمه يا بهيه .. يا أم طرحه وجلابيه
................الزمن شاب وأنت شابه
- بهيه أم طرحه وجلابيه , كانت بتغسل في النيل ضياها عشان تخلى الميه تضوى من نور عينيها ,وكان الصبح نادى لما تطلع ع القنايه تروى الأرض وتزرع الحبه تطلع سنابل , سايره دايره في الغيطان , تجمعها بعافيتها وبكل حنية أيديها .
كانت "بهيه" هى مصر أم السواقى اللى ما تعرف تنام , تروى العطشان بنور ضياها اللى سارى في النيل من أسوان لما للدلتا بفروعها , وتشبع الجوعان من نهودها اللى مليانه بخير غيطانها ,
وتشَغل العاطل في كل مصنع من آلاف المصانع اللى بناها الشعب لما كان زعيمه أسمه "ناصر", لما مات جفت ضروعها , وفى غيابه شح النيل علينا بخير زمانه , بعد ماكان سدنا العالى بيوفر كل نقطة ميه تزرع ملايين من حبات رمالنا , وِيضوى نور كهربته من أسوان لما لحد دارنا ,حتى في الدوار اللى دار عليه الزمن وصار قدرنا .
لما مات أبنك "ناصر" يابهيه , باعوا كل مصنع كان بينتج فيه وِلادك , بعدها صاروا ع الطريق عوطليه .
يا بهيه – أحنا ولاد سفاح مش ولادك يا أصيله , مش نتاج النطفه اللى مرويه بطهر حيضك ,أحنا مش من رحمك . عشان سكتنا ع الديابه تنهش لحم ناصر .اللى رفع الغلابه من ولادك واللى خلى الفقر يرحل ......., ورجعنا نترحم على أيامك , وأنغامك ,وأحضانك , وجناحاتك اللى كانت لم تفرد تغطى كل اولادك مش في مصر بس لكن في كل بلدان العرب اللى كنتى بتجمعيهم , واللى كنتى عاوزه توحديهم .
يا ما حاولوا هتك عرضك .. قمتى أنت بكل عَرضِك أنتفضتى ,وبأنتفاضتك صار ولاد الحرام يبغبغوا وينهبوا , جرفوكى ,
في السياسه: كان سادات العماله اللى عمل مع اليهود "حواله", حَوِل الحق لغياب , وصنع الصهاينه الخراب , حتى "حسنى" صار حمار ركبه كل النصابين والأمريكان ,وفى زمنا الحالى نيلنا بتضيع ميته فى الليالى - وأسرائيل صارت تعربد فى بلد هيلاسلاسى اللى كان حاكمها ناصر بالكنيسة والتعاون الأفريقى مش بالكراسى.
وفى الفن : صارت الروح "فلوس", والنفوس صارت "جاموس" حتى الصِيَع " أوكا وأورتيجا" بدوا علامه في المزيكا , "وأم كلثوم" ضيعوها , والتذوق راح تدنَىَ , والتلوث السمعى والبصرى بقى مَغَنَىَ .
كل ده يا بهيه ,وأنت واقفه ,شامخه , مستنيه نخوه عند راجل أبن راجل نطفته لما تروى رحمك يصير كما الأرض البِكر من أول جماع ينجب البنت اللى يسرى في دمها الحنان ,واللى تجدد شبابك بعد طول العمر تخرج "حنان" من بين فخادك , حتة لحمه بيضه حمره , من عينيها يشع النور يضىء للمستقبل طريق , وتصير مصر "حناااااااااااا ن" اللى حنموت فيها جنان , واللى عشان خاطر عيونها , كل واحد فينا لازم يجرى يحضنها ويروى ظمأه من خمرة خدودها حتى الثماله ل حد مايفنى في ترابها , بالعمل والعرق والحب ويتمنى يموت في أرض الكنانه .
سُمرتك ياحنان كالخمره في النور المذاب , حِنتك اللى اتحنيتى بيها بتطيب ثرى كل من عمل على نهضتك وأرتفع بأمتك , وعوض الشعب الغلبان بالتقدم والازدهار
مش بالغلاء اللى يجيب للفقير الفناء ويترك الحبل لمافيا رجال الاعمال تمص دم الغلبان , لكن بمحبتك .
عشان خاطر عيون المهاا اللى شايف فيها دنيتى ,أنا جيت لأحضانك وأرتويت بعد ما أنكويت , أفردى أحضانك وأروى كل خدامك من حنانك ..ياا حناان , عشان تعود أرض الكنانه "مصر" زى ما كانت أيام "بهيه"ياحنان .. يا اللى عشان خاطر عيونك حبى ليكى ميعوضوش الا "حنان " اللى هى "مصر"
أرض الكنانه ......... وال حنااااااااااااا ن .
*محمود كامل الكومى
كاتب ومحامى- مصرى
ليست هناك تعليقات:
إرسال تعليق