⏪ ... يوم الرؤية, والعيون زايغه فى السمااا
مستنيه ميلاد البدر , ولحظة الميلاد
الكل يغنى رمضام جانا وفرحنا به بعد غيابه أهلا رمضان
ينبرى فؤاد حداد فى التو ينظم الكلام ويهندز الحروف حرف على حرف يصير موزون يبقى الكلام ممنون مع كل سحور - يوصل لآذان عمنا سيد مكاوى يصير اللحن ع الطبله يرن فى الكون يصحيى النايم والغفلان ويلف ويدور على كل الأبواب فى الحارة والشارع والزقاق –"أصحى يا نايم ,أصحى وحد الدايم , وقول نويت بُكره أن حييت الشهرصايم والفجرقايم , أصحى يانايم وحد الرزاق , رمضان كريم .
30 ليله بالتمام والكمال يصوغ العم ( فؤاد حداد )مشاكل الناس يرسلها للمسؤل على لسان الخال ( سيد مكاوى) يرنهم بالطبله فى الأذاعة والتليفزيون , فيفضح المناطيع اللى قاعدين ومش حاسين بهموم الناس , وكتير ما تتحل مشاكل الناس ويختفى الوسواس الخناس .
فؤاد حداد والشيخ سيد مكاوى , رأتهم فى المنام هذا العام داير بينهم الحوار :
رمضان جانا ياشيخ سيد , يافؤاد هنا بس- ماعاد رمضان عندهم زى زمان , فعلا هو اللى يفرط فى مسرى النبى يفهم عِبر رمضان , بيقولوا باعوا القدس كمان ,يعنى فلسطين مش للانسان , ماتكتب لهم ياراجل يمكن يرجع لهم الايمان , هات السيكا ياشيخ والعجم والحجاز وع الطلبه نزل اللحن زى زمان , وقول وسمعنا يا امام .
"أصحى يا نايم ,أصحى وحد الدايم , وقول نويت بُكره أن حييت الشهرصايم والفجرقايم , أصحى يانايم وحد الرزاق , رمضان كريم "
مسحراتى على طريقه ... منقراتى ورا الحقيقه
فلسطين يا ننى العين , فين انت واحنا فين – أنت الحقيقة والأرض والعرض والساعة والدقيقة , أنت العرب ومن غيرك صارت بلادهم من غير جلود صارت ركيكه , هرتك ومرتك لكل غاصب وطامع من صيع أمريكا وأسرائيل الصفيقه – بيقولوا للشيطان قرن , ومن قرنه مارج من نار يحرق الأرض , والأرض عرض , باعوه فى سينا من يوم ماديفيد لبس "كيباه" ع الرأس وأنحنى يؤدى الشعيره
شعيرة حاخامهم صهيون ابو حصيره , صفقة القرن صنعها ترامب من 100 قرن بعد الفرم فى ليبيا واليمن وكمان قبلهم فى العراق وسوريا لحد مصر , ,لَبِسهم لحكام العرب وسلط عليهم ابوصفيحه.
"أصحى يا نايم ,أصحى وحد الدايم , وقول نويت بُكره أن حييت الشهرصايم والفجرقايم , أصحى يانايم وحد الرزاق , رمضان كريم "
ناصر العروبه فى الجنه , والحِنه أمامه حَانه على اقدامه وروحه هايمه مابين أغصان بستان الجنه , حمى العروبة وحاصر صهيون فى كل طوبه – فى العالم الثالث صار نصير
لفلسطين ووقف قصاد الأروبه – وعدم الأنحياز قادها ناصر لأجل العروبه , وفلسطين فى قلبه صارت مسكونه – غدرتوا بيه غدر الثعالب أستشهد وحارب – من يومها واولاد الكامب بيرعوا مع الديابه من عهد كارتر للواد ترامب – باعوا القضيه برغيف وليه – لية خروف ابن الحلوف سياره نياره مابين مكه وتل أبيب على الحماره – للقتل فى السفاره .
ع النيل دقت سفارة تل ابيب الزار واحتفلت بأغتصاب فلسطين بلد الأحرار, وكروش مصريه باعت القضيه وفى الحفله سكرت مع تشيفى ليفنى للصبحية , جتهم رزيه – وع الفرات فى اربيل رفعوا أعلام الصهيونيه كرد وحراميه
"أصحى يا نايم ,أصحى وحد الدايم , وقول نويت بُكره أن حييت الشهرصايم والفجرقايم , أصحى يانايم وحد الرزاق , رمضان كريم "
يا شعب العروبه وفى كل بلاد العروبه طوبه طوبه
الأقصى أسلام , وكنيسه القيامه مسيحيه بالتمام – عروبة أرضكم مافيها فصال وحرمة الديانه مابعدها وصال – سرقهم صهيون وباعهم حكام العرب الأوباش مش ببلاش
لكن مقابل يكتموا ع الانفاس – أنفاس شعوبنا لأجل يقضوا ع الأحساس
ويظل يحميهم حكام أمريكا والاستعمار الصهيونى الوسواس الخناس
ثوره وقيامه – تكون قوامه تقضى ع الرجعيه وحكام دولنا العربيه – وتعيد النضال ضد من قطع الأوصال – نضال شعبى يكون جبار – هادر من المحيط للخليج يفرقع نار
يقضى ع الصهيونيه والاستعمار – ونعيش أمه عربية واحده , شعبها فى اتحاد ووحده وايقاع طبلتنا واحد يرن فى كل غيط ومصنع عربى واحد ويصوم رمضان ويفطر فى وقت واحد ويصحا على صوت الآذان الله أكبر والرجل تدب مترح ماتحب على صوت العودو الطبله تصحيى النايم, والغفلان يصير قايم
أصحى يانايم ,أصحى وحد الدايم
السعى للصوم خير من النوم – دى ليالى سمحه نجومها سبحه
أصحى يانايم , وحد الرزاق – رمضان كريم .
*محمود كامل الكومى
كاتب ومحامى مصرى
ــــــــــــــــــــــــــــــــــــ
مع تحيات روحا ( فؤاد حداد وسيد مكاوى )
ليست هناك تعليقات:
إرسال تعليق