يا مزروعه فى حضن الإيد
شراع الغربه .. جوه السكه ..
قايد لىّ قنديلـُه
وشاربه خيلـُه ..
من بحر السفر والحب والمواعيد
أنا قلبى الوحيد "رحال" ..
باحب البحث عن كلمه ..
وعن معنى
بيجْمعنا .. هلال الشوق
وقطر بيجرى ع الطرقات
صديقتى شنطة الأسفار
أنا مشتاقه للعيله ولا عمرى..
نسيت (ليله) من اللى فات
فى بيتى كل شئ هادى ..
ومهما يكون
لا عمرى الرحله يوم تشغلنى ..
عن أيامى وسنينى
ولا تقدر بحور الدنيا ..
تاخد قلبى للتيار
صديقتى شنطة الأسفار ..
يا مزروعه فى حضن الإيد
بدون مواعيد ..
نروح نيجى .. بدون مواعيد
نقيد شمع الحياه فى الغربه ..
أو فى البيت
ولا عمرى فى لحظه نسيت ..
قلوب أهلى
يا قلب الأم إندهلى ..
وخلينى أعود وأعود
صديقتى شنطة الأسفار
لفين رايحه يا أيامى
ما زلت فى مركب الترحال ..
معايا كل أحلامى
وقبل الرحله ما تبدأ ..
فؤادى للصحاب يشتاق
لا عمرى عشقت مره فراق ..
ولا أحزان
ونفسى أعيش واموت مشتاق
لفجر جديد
***
عبــــيـر الجنــــــدي
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.