.يا بيتا_ شعر محكي | رباب علي

دخلك خبّرني يابيت
عن حلوة تركتا وفلّيت
شو مشتاق قلبي والروح
وعليها ياما حنّيت
ياما وياما شو تمنّيت
لو رحت لْ عندك وشكيت
دخلك خبّرني يابيت
يابيتا لْ كلّك حنين
ياحجار لْ كلّا محبّة/ي/
اشتاقت لتشوفك هالعين

يادار لْ فيها حبّي
قلّا تسامحني قلّا
غيرا والله ماحبّيت
دخلك خبّرني يابيت
يابيتا قلبي دايب
موجود وفكري غايب
خبّرني دخلك يابيت
انْ كنّو اشتاقو الحبايب
عَ فراقا والله انعلّيت
دخلك خبّرني يابيت
يابيتا دخلك قلّي
بعدي بالقلب وعَ البال؟؟؟
وشو بتمنّى تسألّي
عن شوقا وكيف الأحوال
قلبي والله عليها حنّ
وشكلي يابيتا جنّيت!!!
دخلك خبّرني يابيت
قولك بعدا عم تسأل
عن قلبي لْ حبّ عيونا؟؟؟
ولّا عليّي عم تتقل
وتخبّي عنّي جنونا؟؟؟
عشقانة وبدها هالحبّ
مخبّا ويبقى عَ السّكّيت!!!
دخلك خبّرني يابيت
وصّل إلها سلامي
شوقي وحبّي وهيامي
قلّا معها أيّامي
ريتا لو ترجع ياريت
دخلك خبّرني ياريت
...رباب....