خدني معك يا نسيم
خدني ع ضيعتنا
امشي على دروبا
بليلة صيفية
خدني معك بكير
تا زور حارتنا
متل حفنة تراب
سمرة وندية
..................
خدني متل عصفور
بيفيق من بكير
يوقف على الأغصان
ويغني غنية
ومتل سنابل قمح
تلمع بهالوديان
وتغازل الأفنان
بألوان دهبية
..................
خدني متل هالشمس
تشرق على الأحباب
بنورها الضاوي
ع الدني صبحية
تدخل من الشباك
بشعاعها الخلاب
وتداعب الأهداب
بأحلام وردية
....................
متل العطر والفل
والنور لما يهل
والقمر لما يطل
ع دراج السهرية
يملا الدني حكايات
ويعمر السهرات
ليلية بالشرفات
عند المسوية
.....................
خليني شوف الدار
واركع على عتابا
وتشعشع الأنوار
وصلي بمحرابا
ياما بقالي سنين
عم عتب عتابا
قلبي إلى مشتاق
اسهر على بوابا
......................
واقعد مع الأصحاب
شي قعدة هنية
بفية اللبلاب
والخضرة والمية
قلبي بالغربة داب
وما عاد أنا فيي
ومن لوعة الأشواق
عم إبكي يومية
..................................
ملك الأصفر
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.