انا معرفش انا مالي كده لحالي انا كلّيت
انا دموعي اللي جياشه.. وأهة قلبي منحاشه ولا مليت
ولا قادره على الدنيا .. بقع من طولي وف ثانيه
بشيل حملي على دراعي تقول مالك مالوش داعي
انا الساكته ومن غلبي بصبّر صبري على قلبي
واقول ارضى واشيل ذنبي
ولسه الدنيا وخداني افوق وانسى اللي نساني
واتبّت فيا وف حبي
وليه الوحده دي نصيبي وقابله نفسي على عيبي
لا حنيه ولا طيبه ده دي خيبه وتأنيبه
ف قلبي بير لكن فاضي.. لامتذمّر ولاراضي
وليه الخنقه مالياني.. ياريت ياقلب تتغير
ولا تفكر ولا تعاني
هموم الدنيا شايلاها وفرحانه وبتباهي
انا جدعه وبستحمل خلاص مش قادره انا اكمل
يادنيا مش مصحباني ولا صابره على هواني
فليه من ايدي سحباني.. انا بطلت اتجمّل
ولما الكل يتحوّل على قلبي ويتلوّن
لاصحبه نافعه م الاول ولا الغربه اللي بتطوّل
قبلت بكل اوجاعي.. تقول مالك مالوش داعي
وببكي ليه على الايام سنين عمري وعدّو اوام
لا عارفه اعيش وانا ساكته ولا لاقيه لوجعي كلام
مدام الغربه دي بتوجع ولا دمعي اللي هيرجع
ياقلبي اجمد قصاد الناس وكون اجدع
وعندي ابكي وانا هسمع
مهو انت اللي عايشها ملاك ما يتألم
تبيع فرحك وترضي آساك وتتبسم
لا مني فيك انا فاهمه.. لا مني شخص مش واعي
تقول مالك ما لوش داعي
بجد تعبت مش عارفه.. انا خايفه من الناس وم الدنيا
ومن غيبتي ومن خيبتي منيش شايفه مانا خايفه
ونفسي يدوب احس امان ف حضن حبيبي وولادي
وارضي ف حضنه وَادّادي
ويفهم نفسي وصراعي ويرضى الموت ولا وداعي
وقابل كل أوضاعي
تقول مالك مالوش داعي
-
* نرمين عبد الرازق
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.