أمي من خوفها عليك
وصتني آخد بالي منك
و قالت لي : يا ابني !
يا ابن بطني !
وصيِّتي يا ضنايا إنك
تشتال أخوك في رموش عينيك
و مهما تعبك ، و لا قال لك
و مهما كان من قسوته ، وخصامه ليك
و مهما خيِّب يا ابني ظنك
هو اللي فاضل مني ليك
طول ما انت شايله جوه قلبك
أمك وأبوك راضيين عليك
أمي اللي كانت كل ليلة . . . .
ألف مرة . . . .
ألف مرة . . . .
ألف مرة . . . .
أسمعها تصرخ وتناديك
و انت قلبك . . . .
قلب قطر حديد مسافر
مش بيسمع . . . .
مش بيرجع . . . .
من قريِّب أو بعيد !
كل يوم تتهجَّى اسمك
مش على لسانها غير اسمك !
من سؤالها ليلاتي عنك
قلت : يوم ما تعود وترجع
عندها راح يبقى عيد
يوم ما تتطمِّن عليك
يا ابن أمي وأبويا فاكر ؟
أمنا الغالية وأبونا
يوم ما قلت انك مسافر
قعدوا طول الليل معاك
يترجُّوا فيك . . . .
ويقولوا لينا . . . .
يوم ما ترجعوا م السفر
مش ها تلاقونا
النهاردة أمك وأبوك
بيبلغوك . . . .
إنهم .. ..
همه كمان سافروا وسابونا !
إيه اللي فاضل لسه بينا
بعد ما الغاليين فاتونا
اللي ضحوا كتير عشانا
وكبرونا وعلمونا
غير وصيتهم يا أخويا
و الوصية ....
الوصية بين إيديك
*متولي محمد متولي
دمياط
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.