قبل ما تنهي المهمة
قبل ما تفجرنا يا ابني
بص لي و حقق في وشي !
بص للناس اللي روحهم
رايحة منهم !
و اللي م الخوف - يا ابني - ماتوا
قبل ما تحكم بموتهم !
بص في عنينا و حقق
تلقى فينا امك و ابوك !
قبل ما تنهي المهمة
قبل ما تشوه بجهلك ..
مجد أمة
حملت الدنيا من الليل للنهار
أمة صنعت لك تاريخ ..
بتكافئها ازاي بعار ؟!
قبل ما تنهي المهمة
قول لي قبلا ..
لسه فاكر حضني يا ابني ؟!
لسه فاكر ..
لما كنت تقول لي يا امه
أبات في حضنك !
هو فيه في الدنيا حاجة اغلى من امك
مهما حاولوا يخدعوك
اللي بالمال اشتروك ..
بكره يا ابني ها يبيعوك
بكره إيه ..
دول يا قلب امك وابوك
للموت يا كبدي شيَّعوك
قبل ما تنهي المهمة
نفسي يا ابني اسأل سؤال
هو عقلك خاب و مال ؟!
و لا قدروا يغيروك
برمجوك !!
علموك ازاي تخون !
علموك بلدك تهون !
علموك ازاي تكون ..
لعبة ف إيديهم
تلغي عقلك !
تنسى دينك
تكره عوايدك !
تفتكر بس الأوامر
لما همه يأمروك !
علموك تنسى صحابك
وتقاطعهم .. وتعاديهم !
يا اللي كنت زمان ..
نهار و ليلاتي بينهم
ما تفارقهم ..
حتى لو جاروا عليك !
علموك ازاي يا واد ..
تدوس وتضغط ع الزناد ؟!
وتفرَّغ الرشاش بكل بساطة فينا !
من غير ماترمش
و الا يتهز السلاح اللي ف إيديك !
علموك ازاي تنشن ع الهدف
وتصيبه ..
حتى لو كان هو ..
أمك أو أبوك !
*متولي محمد متولي
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.