⏫⏬
قال لييا حلوة لمسة إيدك لما بتمسح
فوق جبيني بتنعشني وبشعر مرتاح
إيدك متل اليسمينة بعطرا الفواح
بتشفي قلبي بتحييني وبطفي النار
.............................
خليكي دوم قبالي تا ناغيكي
واتغزل بي عينيكي وإسرح فيكي
قلبي صاير مجنونك دايب فيكي
يا وردة ويا جورية عليكي شو بغار
.............................
يا أم الشال النهدي مين متلك مين
يا زينة هالسهرية وقمر بتشرين
جاي ولعيونك جايب عقد اليسمين
وبدي إكتب لعيونك أجمل أشعار
..............................
أنا لما بسمع صوتك قلبي بيطير
وبيرفرف متل فراشة ومتل عصافير
يلي كلماتك حلوة وصوتك حرير
ومن سحرك خجل الدوري وطير الوروار
..............................
يا أم جبين العالي وعنقك بلور
وطولك من طول النخلة ومن شجر الحور
حطي إيدك بإيدي وخلينا ندور
ونعمل أحلى سهرية وأجمل مشوار
................................
بدنا نطلع عالقمر وفوق لنجوم
وفوق النسمة السحرية نركب لغيوم
ولما بيطل الصبح ويغلبنا النوم
رح غفيكي بعينيي يا ست الدار
*د . ملك محمود الأصفر
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.