الشاب ده اتكلم و قال ارسم حلمك بالقلم الرصاص علشان مش هيتحقق و هيتمسح ..
و اكتب بالجاف شهادة وفاتك .. و ارسم بالالوان صورتك في الشارع
الشاب بيتكلم بحرقه و قهر ..
يطلع راجل كبير و يقولوا بدل ما انت بتبيع اقلام روح دور علي شغل تاكل منه عيش و تفتح بيت ..
الشاب قال له هو انا لقيت شغل و قولت لا دة انا بلف علي رجلي علشان خاطر اصرف علي اختي اللي في جامعة و امي ..
الراجل يقول له يعني انت مش لاقي شغل و اختك في الجامعة ..
الشاب طلع شهادة تخرجه و الصدمة انه متخرج من كلية اقتصاد و علوم سياسية جامعة القاهرة دفعة 2012 بتقدير جيد جدآ وماشتغلش في مجالة علشان هو مش ابن باشا و لا ابوه حاجة كبيرة في البلد ماشتغلش علشان مش معاه واسطة ..
يرد الراجل الكبير المستفز و يقول له و انت ايه اللي يدخلك كلية و انت عارف انك مش هتعرف تشتغل بيها ..
ردت بنت علي الراجل و قالت له و انت مين علشان تقول يدخل ايه و مايدخلش ايه هو مش بني آدم من حقه يحلم و يحقق حلمه مش ذنبنا انكو اتولدوا و الجذمة في بوءكو مش ذنبه انة دخل كلية و نجح و تعب فيها علشان يحقق لاهله مستوي كويس
اللي انت بتقول له دور علي شغل ده احسن منك و من اللي زيك علي الاقل لسة عنده امل و حلم عاوز يحققه .. مش زيك عايش بتقول اه اه لحد ما طلع عين ابونا من قوله اه بتاعتكو
الراجل بصلها و قال لها بتكلميني كده ازاي .. قالتله بتكلم بلساني اللي انت كل يوم بتخرسه بمواقفك و بتطبيلك ..
طلعت ست كبيرة وقالتلها يسلم فمك و الراجل الناس هاجت عليه و الشاب قالها ربنا يكرمك حسستيني ان انا مش لوحدي ..
قالتله خلي عندك هدف انت احسن مننا بإرادتك و لما تيجي تبيع قول قلم رصاص ارسم بيه الحلم
و قلم الوان لون بيه الحلم و قلم جاف اكتب بيه حلمك اللي اتحقق.
خلي عندك امل في بكرة .. احنا كتير
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.