قلا...نفسي ياحلواية مرة
بالبحر الأبيض إتمرى....
ونفسي بموج عيونك إغرق
أو عشفافك كون الحمرة....
ونفسي بستانك يتمشور
ع صابيعي وإقطف زهرة....
إعصرها ع رماد العمر
ترجعني.. عالمنقل جمرة....
وخلي ليلك عندي يسهر
ويطول ع زنودي السهرة....
وإفرشلو ع صدري فراش
وعالشهقة.. أحلامو.. إقرا....
........
قالتلو...
نفسي تحس بحسي مرة
وعن جد.. بجسمي تتمرى....
جسمي صار مرايه بأمرك
وإنت بعدك... عم تتحرى....
قرب صوبي..قوم اتحرك
عري أحلامك وتعرى....
شوف مراية جسمي بعينك
من عيوني لتحت السرة...
وطفي بمراياتي جمرك
دخلك..ليشك بعدك برا...؟
بعدك صافن ..لك شو ناطر؟
ياخوفي تدوخ بهالنطرة....
وبحكياتك تبقى شاطر
وبأحلامك تنهي السكرة....
وتخليني متل الخمرة
المنسية من عمرا .. بجرة....
مركونة عرفوف الوقت
وعم تنطر ..كاسك ياحسرة....
.....
شعرك حرك..إحساساتي فيك
وخلاني مرايه بإيديك.......
تاريك بشعرك تاريك
بياع حروف ... ومو شرا....
سكر عالحلم وخليك
مع أشعارك عم تتمرى.....
مراياتي قرفت عينيك
قوم طلاع بغيري اتمرى....
وسلم ع نرسيس كتير
وبعتلي..من فضلك كسرى....
........ ..
جمال القجة
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.