فاكره انتى لما قولتىالنهارده رصيدك خلص
قولتى انت حصان عجوز
وانتى محتاجه لفرس
---
فى ساعتها سكت ليه
طب وليه صابنى خرص
---
عارفه ليه؟
يومها كنت نويت ابيع
كل لحظه شىء فظيع
كنت مشدود من حياتى
ايوه كنت خلاص باضبع
----
انتى ايه؟
انتى فجر رسمتهولك
الضيا زغلل عنيكى
حتى عمرى وهبتهولك
بس والله كتير عليكى
---
كنتى ساكنانى ف ضلوعى
كات عيونى اجمل حرس
فجأه ولاهمك دموعى
لاعتاب ولا حتى جرس
---
إنتى نار قادت فى قلبى
إنتى برضو طفتيها
كنت خايف م المخبى
كنت لعبه لعبتى بيها
---
كنت سجادة صلا
خدت ايد ك للسما
لما كنت بين ايديكى
وابتدى قلبى يداديكى
---
فتحتى شراعة طبيعتك
طل منها اكبر شيطان
هيه لحظه قوام طاوعتك
كنت حاسس فيه امان
--
انتى مش غلطة حياتى
انتى جرح قديم وطاب
انتى كاس شربتيهولى
خد بإيدى من عذاب
--
كنتى إنتى قبلتى
كنتى وِردى ونار عذابى
كنتى قافله دنيتى
م النهارده فتحت بابى
--
حاعيش حياتى الكون داكله
ادوق جمال شمسه وضله
حاشرب الترياق يداوى
واكتب الاحزان غناوى
لو ياقلبى كنت غاوى
عندك الياسمين وفله
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.