اليوم عندي خرافيه
بدي احكيها
خرافيتي عن عايشه
و عايشه هاي
هي ستي
الله يرحمك يا ستي
---------------
ستي كانت جفرا
يعني صبيه
فوق الثمنطعش بشويه
كانت جميله
و من اهل الطبقه المخمليه
مثقفه و متعلمه
بتقرا و بتكتب
اوووه كانت دارسة للإعدادية
الله يرحمك يا ستي
--------------
ستي كان الها نظره
و عقلها بتبع لعشره
تقرا نظرة العين
قبل الكلمه ما تطلع
اصلا هاي صفه في
ورثتها عن ستي
الله يرحمك يا ستي
--------------
ستي عايشه
لسانها اديب
و بالحق جلاد
عاشت و ماتت قويه
تعبي الزير من العين
و تروي عطشي
و عطش كل البلاد
الله يرحمك يا ستي
-------------
ستي حبلت و خلفت
و جابت الصبيان
و حلت خلفتها
بزهرات بنات
ستي زرعت وحصدت
و المحصول ع راسها رفعت
و للسوق فيه مشيت
و باعته برزق الكريم
و كل الصبايا و الصبيان
كبرت و علمت
اصغرهم عضو في البرلمان
الله يرحمك يا ستي
------------
ستي عاشت و ماتت
و بقلبها غصه
و غصتها انا
ياما حلمت و تمنت
اعيش بكنف قريتنا
اشرب من العين
و القط التوت و العنب
عن امه
ياما حلمت انام ع الاسطوح
و هوى بلادي
يرد الروح
و قلبي ينسى همه
آخ
الله يرحمك يا ستي
------------
و انا ما قدرت يا ستي
والله حاولت
رحت الفدائيه و تنظمت
و بكل الاراضي حاربت
الا ارض فلسطين
ما خلوني اقربلها
و كل ما امشيلك خطوه
يرجعوني عشره
و بالاخر كحشوني بره
اخ .. الله يرحمك يا ستي
-------------
ستي شو عملت
و لا اشي, بس
صرخت و عيطت
بدي اروح لستي
عمرها و عمري ضاع
و ما حضنتها و حضنتني
ردو ببرود
و توهان معهود
ستك انساها
و لا تحلم يوم تعود
خلص ماتت و الله يتولاها
بدك بتزورها
لما تسكن المقبره
يعني بعد ما تموت
اخ .. الله يرحمك يا ستي
----------------
صفيت مشرد وحيد
لاجيء عند قرايبي
و اهلي و عمومتي
و ما الي غير دمعتي
و بقلبي صرختي
و ادعي لربي
الله يرحمك يا ستي
***************
جاد عبدالله
خرافيه: قصه وحكايه
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.