يـا ريـت ــ شعر محكي |هبة شريقي

يا ريت فينا نْضيع بالوادي
ويبقى مَعانا الحبّ زُوَّادي
وكل ما لْمَحْنا الدّرب عَنّو نْحِيد
ونرجع نْتوه بهالدّني منِ جْديد

يا رَيت بَعد الرَّيت وعلوّا
تكون انتَ آدم ، كون انا حوّا
سُبحان هالـ مِن خِيرتو سوّاك
وَيلي أنا بْعَقلاتي شو سَوّا

وسُبحان هالّلي بالقَدِر عَلاّك
نسمةْ دوا لَجْراحك بلادي
ياريت فينا نضيع بالوادي

يا ريت فينا نضيع ع التلّي
تا قلّك الـ ما انقال وتقلّي :
لو تعرفي قدّيش حبّيتك
وقلّك أنا حَبّيتك زيادي
نسهَر سوا
عا ضوّ نجمات الهوى
ونزركش الأزهار سجّادي
ونْنام نتغطى بِغيمات المسا
تَ تزيحْها الشّمس بْهنا تنادي :
لك فيقوا زَلزلتو الأرض
خلّو المدى هادي
لك فيقوا زلزلتو الأرض
واتهدّو يا ولادي