عشان خطرك انا صابر ومتحمّل
يطول الليل وانا صابر ومطمّن
عشان الفجر هيجمّل حواريكي
هتشرق شمس وتنوّر دروب فيكي
وتتبخّر دموع الحزن ف عنيكي
وتتبسّم خطاويكي وتتقسّم مواويلك
على الاوتار نشيد بلدي واغنيكي
وأكتبلك بحور م العشق وارويكي
عشان خطرك انا صابر على جرحي
ولا قايل ما انا التايه
فى دوامة سواقيكي
عشان خطرك هاعيش
الحلم وهكمّل حكاويكي
هرم شامخ ونيل جاري
على ضفة لياليكي
ولا قال الهرم اه يوم
ولا ليكي في يوم راح اللوم
ده انا شارب ومن نيلك
ولا غيرك حبيبه ف يوم
ده انا مشيتك سنين مشوار
عشقتك دار
عشقتك طرحه وطاقيه
وطين وعمار
فى ضحكة بنت مصريه
وراجل م التعب شقيان وعاش سهران
يعيش يحلم هنا يطلع
في حلمه نهار
يعيش مستور ومش عايز دهب ولا مال
ولا يوم قال
ولا اتكلّم ده عايش بس متألّم
ده عايش بس متألّم
عشان خطرك انا صابر ومتحمّل
******
الشاعر المصري / احمد ابراهيم
ليست هناك تعليقات:
إرسال تعليق
يمنع نشر أي تعليق مسيء للأديان السماوية, أو يدعو للتفرقة المذهبية والتطرف, كما يمنع نشر أي موضوع أو خبر متعلق بأنشطة إرهابية بكافة أنواعها أو الدعوة لمساندتها ودعمها,أو إساءة للشخصيات العامة
كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي الموقع .
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة الموقع لا تتابع التعليقات المنشورة او تقوم بالرد عليها إلى نادراً.